कोरोना बढैसँगै सर्तकता अपनाउन जिप्रका झापाको आग्रह

झापा । कोरोनाको संक्रमण बढेसँगै जिल्ला प्रशासन कार्यालय झापाले माक्स लगाएर मात्र हिँड्न आग्रह गरेको छ ।

जिल्ला प्रशासन कार्यालय झापामा सोमबार भएको डीसीएमसीको बैठकले काम नपरी भीडभाडमा नजान, संक्रमणको शंका भएमा नजिककैको स्वास्थ्य संस्थामा संक्रमण परीक्षण गर्न आग्रह समेत गरेको छ ।

जिल्ला स्वास्थ्य कार्यालयको संयोजनमा जिल्लाका सबै स्थानीय तहमा कोभिड १९ विरुद्धको बुष्टर खोप लगाउन सबैलाई अनुरोध गरिएको छ । जिल्ला स्वास्थ्य कार्यालयले कोभिड १९ को संक्रमणको वर्तमान अवस्थाको विश्लेषण गरी जिल्लामा आवश्यक पर्ने औषधी, मास्क, परीक्षण गर्ने किट, भीटीएस लगायतका अन्य सामग्रीको मौज्जाद व्यवस्थापन गर्ने, गराउन अनुरोध गर्ने निर्णय भएको प्रमुख जिल्ला अधिकारी छविलाल रिजालले जानकारी दिए ।

दुवागढीस्थित निर्माण अन्तिम चरणमा पुगेको होल्डिङ सेन्टरमा कम्तीमा एक सय बेड नेपाली सेनाले तयारी अवस्थामा राख्ने निर्णय भएको छ । काँकरभिट्टास्थित प्रदेश नाकामा मेचीनगर नगरपालिका इडीसीडी, आइओएम र नेपाल रेडक्रस सोसाइटी झापा शाखाले आपसमा समन्वय गरी कोभिड १९ को परीक्षणलाई प्रभावकारी बनाउने र जिल्लाका सबै स्थानीय तह, स्वास्थ्य संस्था, स्वास्थ्य कार्यालय, नेपाल रेडक्रस सोसाइटी लगायत गैर सरकारी संस्थाहरुले कोभिड १९ को संक्रमण विरुद्ध सचेतना अभिवृद्धि गर्ने निर्णय भएको छ ।

प्रमुख जिल्ला अधिकारी रिजालको अध्यक्षतामा भएको बैंठकमा सुरक्षा निकायमा प्रमुखहरुको सहभागिता रहेको थियो ।